செல்போனில் பயன்படும் WAP என்றால் என்ன? துறை சார்ந்த விளக்கம்

இப் பதிவானது நம் செல்போனில் இணைய இணைப்பை ஏற்படுத்தப் பயன்படும் கம்பியில்லாப் பயன்பாட்டு வரைமுறை (Wireless Application Protocol , WAP) ஜப் பற்றியது. இது முற்று முழுதாக துறை சார்ந்த விளக்கம்.

[இப் பதிவில் சில ஆங்கில சொற்பதங்கள் பாவித்துள்ளேன்.. அவை தவிர்க்க முடியாதவை. மன்னித்து விடுங்கள்...]

கம்பியில்லாத் தொடர்பு சாதனங்களாக செல்போன், PAGER, PDA, உள்ளங்கைக் கணினிகள் என்பவற்றைக் குறிப்பிடலாம். WAP இன் பிரதான தொழிற்பாடாக கம்பியில்லாத் தொடர்பு சாதனங்கள் இணைய (Internet) இணைப்பைப் பெற உதவுவதைக் குறிப்பிடலாம். அதாவது, கணனி மூலம் இணைய இணைப்பு ஏற்படுத்த இணைய வரைமுறைகள் (IP) எவ்வாறு உதவுகின்றதோ, அது போலத் தான் கம்பியில்லாத் தொடர்பு சாதனங்களில் இணைய இணைப்பினை ஏற்படுத்த WAP பயன்படுகின்றது.


செல்போன் தயாரிப்பில் முன்னணியில் இருந்த/இருக்கும் நோக்கியா, எரிக்ஸன், மோட்டரோலா மற்றும் பிற நிறுவனங்கள் இணைந்து 1997-இல் இந்தக் கம்பியில்லாப் பயன்பாட்டு வரைமுறைக்குச் செயல் வடிவம் கொடுத்து வெளியிட்டன.

கொஞ்சம் ஆழமாக சொன்னால்,
1997ஆண்டு காலகட்டத்தில் செல்பேசியின் திரை சிறியதாகவும், கறுப்பு வெள்ளைத் திரைகளும் தான் இருந்தன. அந்தக்காலகட்டத்தில் இந்த WAP இனை செல்பேசியில் பயன்படுத்த, செல்போனில் சில மாற்றங்களைச் செய்ய வேண்டி இருந்தது. அவற்றில் முக்கியமாக பின்வருவனவற்றைக் குறிப்பிடலாம்.

• இணைய உலவியானது கணனியில் இணையப் பக்கங்களைக் காட்ட பயன்படுகின்றதோ, அதேபோல் தான் கம்பியில்லாத் தொடர்புசாதனங்களில் இணையப் பக்கங்களை பார்க்க இணைய உலவி தேவைப்படும். இதனை குற்றுலாவி (Micro Browser) என அழைப்பார்கள்.
• இணைய உலாவியில் பயன்படுத்தப்படும் குறியீட்டு மொழியான மீயுரைக் குறியீட்டு மொழி (HTML) போன்று, செல்போனில் குற்றுலாவிக்கும் ஒரு குறியீட்டு மொழியை அறிமுகப்படுத்தினார்கள்.அதனை கம்பியில்லாக் குறியீட்டு மொழி (Wireless Markup Language , WML) எனக் குறிப்பிடப்படும்.இது மீயுரைக்குறியீட்டு மொழியை விட எளிதானது. குறைந்த அளவிலான ஒட்டுக்களையே (Tags) கொண்டது .

பொதுவாக நம் செல்போனில் இணைய இணைப்பை ஏற்படுத்த முக்கியமாக செல்போசியானது பின்வரும் வசதிகளை கொண்டிருக்க வேண்டும்.

• செல்பேசியில் WAP வசதி இருக்க வேண்டும்.
• உங்களுக்கு சேவை வழங்கியவர்கள், உங்களுக்கு இணைய இணைப்பிற்கான அமைப்புகளை (Settings) வழங்கியிருக்க வேண்டும் , அதாவது எந்த எண்ணை அழைப்பது, வழங்கி அல்லது நுழைவாயிலின் முகவரி (Gateway address), பயனாளர் பெயர், கடவுச்சொல் ஆகியவை.
• சேவை வழங்கியவர்கள் தனது வலையமைப்பில் ஒரு வழங்கி அல்லது நுழைவாயில் (Gateway) ஒன்றை நிறுவியிருக்க வேண்டும் . இந்த நுழைவாயில் தான் உங்கள் செல்போனை இணையத்திற்கு இணைப்பதற்கு உதவுகின்றது.
• இணையத் தள இணையப்பக்கங்கள் WAP இனைக் கொண்டு தனது சேவைகளை வழங்க வேண்டும். பொதுவாக, இணையப்பக்கங்களில் நிறைய படங்கள் மற்றும் தகவல்கள் இருக்கும். ஆனால், செல்போன் மூலம் அவற்றைப் பார்க்க குறைந்த அளவு படங்களாகவும் மற்றும் குறைந்த அளவு நினைவிருப்பிடம் கொண்ட பக்கங்களைச் செல்பேசிகளுக்கென தனியாக வடிவமைத்தல் வேண்டும்.
  

எப்படி செல்போன் குற்றுலாவி (Micro Browser) தொழிற்படுகின்றது?

எமது செல்போனில் இணையத்தை இணைக்க இணையதளத்தின் முகவரியினை உள்ளிட்டு அனுப்பும் போது...
செல்போனிலிருந்து வரும் கம்பியில்லா குறியீட்டு மொழியானது (WML) நுழைவாயிலில் (Gateway) வைத்து தகவல்களை HTML மொழிக்கு மாற்றம் செய்யப்பட்டு இணையத்திற்கு அனுப்பப்படுகிறது . அதுபோல், இணையத்தில் இருந்து வரும் HTM மொழியில் அமைந்த தகவல்கள், செல்போன் புரிந்து கொள்ளும் மொழிக்கு அதாவது WML ஆக மாற்றப்படுகிறது.

செல்போனில் இணைய இணைப்பை பயன்படுத்தும் போது கவனிக்க வேண்டியவை...

இந்த வகை இணைப்பின் வேகம் மிகக்குறைவு. அதாவது, ஒரு விநாடிக்கு 9.8 Kbits வரை மட்டுமே பெற முடியும். எனவே தான் ஒரு இணையப் பக்கத்திற்குச் செல்ல வேண்டுமெனில் வெகு நேரம் எடுக்கின்றது. கவனிக்க வேண்டியது என்னவெனில், இணைப்பு ஏற்படுத்திய பின் தரவு அனுப்பப் பட்டாலும் சரி, அனுப்பாவிட்டாலும், இணைப்பு இருக்கும் நேரம் முழுவதற்கும் கட்டணம் செலுத்த வேண்டும்.


செல்போனில் இணைய இணைப்பில் இருந்த இவ்வாறான சிக்கல்களை நீக்க பிற்காலத்தில் (1999 க்குப் பின்) படிப்படியாய் செல்போனில் இணைய இணைப்பிற்கு WAP உடன், மீயுரைப் பரிமாற்று வரைமுறையும் (HTTP) சேர்த்து அறிமுகப் படுத்தப்பட்டது. மேலும், இணைய வேகத்தை அதிகப்படுத்த பொதுப் பொட்டல வானலைச் சேவை (GPRS) அறிமுகமானது.

GPRS ஜப் பற்றி எனது முந்தைய பதிவுகளில் வாசித்து அறிந்து கொள்ளலாம். அதனை வாசிக்க இச்சுட்டியை அழுத்துங்கள். பகுதி 1 மற்றும் பகுதி 2

WAP ஜப் பற்றிய இப்பதிவு உங்களுக்கு பிடித்திருந்தால், மற்றவர்களும் அறிந்து கொள்ள ஓட்டைக் குத்த மறந்திடாதிங்க சார்...
அடுத்த பதிவில் சந்திப்போம்...

இப்பதிவை PDF ஆக தரவிறக்குக

GPRS என்றால் என்ன? பகுதி-2 - துறை சார்ந்த விளக்கம்

GPRS பற்றிய பகுதி 1 இல் "குறியீட்டுத்தகவல்கள் குறைத்தல்" அதாவது இணைய வேகத்தினை எவ்வாறு அதிகரிப்பது தொடர்பாக ஆராயப்பட்டது. அதன் மிகுதி இன்றைய பதிவில் அலசப்படுகின்றது.

செல்பேசிக்கு ஒன்றுக்கு மேற்பட்ட நேரத்துண்டுகளை வழங்கி அதன் இணைய வேகத்தை இன்னும் அதிகப்படுத்தலாம். பொதுவாக பேச்சுத்தடத்திற்கு ஒரு நேரத்துண்டு போதுமானது . குறிப்பிட்ட தரவு அனுப்ப சற்றே அதிக அளவு பட்டை (bandwidth) தேவைப்படும். எனவே, ஒரு தள நிலையத்தில், ஒரு குறித்த நேரத்தில் உள்ள எட்டு நேரத்துண்டுகளில் ( தற்போது பேசுவதற்கு பயன்படும்நேரத்துண்டுகள் தவிர) எஞ்சியுள்ள நேரத்துண்டுகளை ஒரே செல்பேசிக்கு வழங்கலாம். அதிக பட்சம் ஒரு நேரத்துண்டில் நொடிக்கு (குறியீட்டு தகவல்களை ஒதுக்கி ) 21.4 KBits வரை அனுப்பலாம் (பகுதி 1 இல் ஆராயப்பட்டது).

ஒரே நேரத்தில்

• இரு நேரத்துண்டுகளை ஒரு செல்பேசிக்கு வழங்கினால் 2X21.4= 42.8 KBits அளவு தரவு அனுப்பலாம்.
• மூன்று நேரத்துண்டுகளை ஒரு செல்பேசிக்கு ஒதுக்கித்தரவு அனுப்பினால் 3X21.4=64.2 KBits தரவுப் பரிமாற முடியும்.
  

இப்படி ஒரு நேரத்தில் உள்ள எட்டு நேரத்துண்டுகளையும் ஒரே செல்பேசிக்கு வழங்கிப் பின் தரவுப் பரிமாற்றம் செய்தால் 8X21.4=171.2 KBits வேகத்தில் இணைய வேகம் ஏற்படுத்திக்கொடுக்கலாம். 170 KBits என்பது உண்மையிலேயே சற்று வேகமான இணைய இணைப்பு. ஆனால் ஒரே நேரத்தில் எட்டு நேரத்துண்டுகளையும் ஒரு செல்பேசிக்கு வழங்குவது செயல்முறையாய் இயலாத காரியம் (ஒரு நேரத்தில் எல்லா நேரத்துண்டுகளும் பயன்படுத்தப்படாமல் இருப்பதில்லை ). எனினும் , கோட்பாட்டுப்படி (theoretically), GPRS இன் வேகம் 171.2 KBits எனக்கொள்ளலாம்.

இந்த GPRS சேவையின் சிறப்புக்களைச் சுருங்கக்கூறின்,

1. இணைய இணைப்பின் வேக அதிகரிப்பு.
2. இணைப்பு இருக்கும் நேரம் வரை கட்டணம் வசூலிப்பது போய், எவ்வளவு தரவு அனுப்பப்பட்டுள்ளதோ அதற்கேற்றாற்போல் கட்டணம் (Volume based Billing).
3. வலையமைப்பிலுள்ள வானலை வளத்தை (Radio Resource), அதாவது ஒலிபரப்பியின் பயன்பாட்டை அதிகரித்து , சரியான விதத்தில் பயன்படுத்தி நிறையப் பயன்களைப் பெறுதல்.
4. செல்பேசி, இணைய இணைப்பு ஏற்படுத்த எடுத்துக்கொள்ளும் காலத்தை வெகுவாய்க் குறைத்தல்.
   

GPRS உருவாக்கம் பற்றிய சில தகவல்கள்....


இந்த GPRS சேவைக்கான வரன்முறைகள் (Specifications) 2.5G இல் வகுக்கப்பட்டன. முதல் முதலாக 2001-ல் GPRS வசதி கொண்ட செல்பேசியை எரிக்ஸன் அறிமுகப்படுத்தியது.

செல்பேசிகளை GPRS சேவை வழங்குவதன் அடிப்படையில் மூன்று வகைகளாகப் பிரிக்கலாம்.

• வகை A: இவ்வகைச் செல்பேசிகளைப்பயன்படுத்தி ஒரே நேரத்தில் பேசவும் இணையத்தில் உலவி, தரவுப்பரிமாற்றமும் செய்ய இயலும். ஆனால் இவ்வகையை நடைமுறைப்படுத்த முயன்றால் செல்பேசியைத் தயாரிப்பதில் சிக்கல்களும், அதிக செலவும் ஏற்படும் . எனவே இவை பரவலாக உபயோகத்தில் இல்லை.
• வகை B: இவ்வகைச் செல்பேசிகளைப் பயன்படுத்தி ஒரு நேரத்தில் பேசவோ அல்லது தரவுப்பரிமாற்றம் செய்யவோ மட்டும் முடியும் . இரண்டு வேலைகளையும் ஒரே நேரத்தில் செய்ய இயலாது. தரவுப் பரிமாற்றம் நிகழ்கையில் அழைப்பு ஏற்படும் போது... அழைப்பை ஏற்றுக்கொண்டு தகவல் பரிமாற்றத்தினை ஒத்தி வைக்கலாம். அழைப்பு முடிந்ததும் மீண்டும் தரவுப் பரிமாற்றத்தினைத் தொடரலாம். இந்த வகை-B ச் செல்பேசிகளே தற்போது சந்தையில் அதிகம் இருக்கின்றன.
• வகை C: இந்த வகைச் செல்பேசிகளைப்பயன்படுத்தி தரவுப்பரிமாற்றம் மட்டும் செய்ய முடியும் . அழைப்பிற்குப் பயன்படுத்த முடியாது. தரவுப்பரிமாற்றத்திற்கு மட்டும் இவ்வகையான செல்பேசிகள் வடிவமைக்கப்பட்டதால் தற்போது இவ்வகைச் செல்பேசிகள் உபயோகத்தில் இல்லை.

உங்கள் செல்பேசியில் GPRS சேவை ஏற்ப்படுத்துதல்...

GPRS சேவையைப் பயன்படுத்தி இணைய இணைப்பினை ஏற்படுத்திக் கொண்டவுடன் ஒரு முகவரி (IP address) உங்கள் செல்பேசிக்கு வழங்கப்படும். இவ் முகவரியானது ஒவ்வொரு முறை இணையம் இணைக்கும் போதும் மாறிக்கொண்டே (Dynamic) இருக்கும். உங்கள் செல்பேசியில் GPRS வசதி இருந்தாலும், இச்சேவையினை உங்களது சேவை வழங்குநர் (Service Provider-Hutch, Airtel, Dialog) தான் ஏற்படுத்தித் தரவேண்டும். ஒவ்வொரு சேவையாளரின் வலையமைப்பிலுள்ள GPRS சேவையை ஏற்படுத்த உங்கள் வழங்குநர் தரும் அமைப்புத் தகவல்களை (Settings) உங்கள் செல்பேசியில் உள்ளீடு செய்தல் அவசியம். இந்த அமைப்புத் தகவல்கள் செல்பேசிக்கு செல்பேசி வேறுபடும். உங்கள் செல்பேசியில் அமைப்பு அல்லது இணைய வசதியை ஏற்படுத்தி தரும் பட்டியைச் (GPRS settings) சுட்டி இந்தத் தகவல்களை நீங்கள் பதிவு செய்து கொள்ளலாம். இந்த அமைப்புகளில் முக்கியமானது அணுகு புள்ளி ( Access Point Node-APN) எனப்படும் . அதாவது, ஒரு சேவையாளரின் வலையமைப்பிலிருந்து இணையத்திற்கு இணைக்கையில், எந்த நுழைவாயின் மூலம் இணைப்பது என்பதைக் குறிப்பதே இந்த APN ஆகும். ஒரே வலையமைப்பில் ஒன்றுக்கு மேற்பட்ட APN உம் இருக்கலாம்.

எது எப்படியிருந்தாலும், கோட்பாட்டுப்படி170 KBits வேகம் என்று சொன்னாலும் நடைமுறையில் அண்ணளவாக 56 KBits (56-114 kbit/s) வேகம் வரை தான் GPRS சேவையை பெற முடியும்.

அடுத்த பதிவில் சந்திப்போம்.... மறக்காமல் ஓட்டை குத்தி விடுங்கோ....

இப்பதிவை PDF ஆக தரவிறக்குக

GPRS என்றால் என்ன? துறை சார்ந்த விளக்கம்

GPRS இன் தமிழ் பெயர் பொதுப்பொட்டல வானலைச் சேவை (General Packet Radio Service).

GPRS இணையத்தின் சேவைகளைச் செல்பேசி வரை கொண்டு சேர்க்க கம்பியில்லாப் பயன்பாட்டு வரைமுறைகள் (WAP) பயன்பட்டது. இந்த வரைமுறையைப் பயன்படுத்தி இணைய இணைப்பு வேகத்தினை அதிகரிப்பதே இந்த GPRS இன் நோக்கம் . இச்சேவை எவ்வாறு ஏற்படுத்தப்படுகிறதென்பதைக் காணுமுன் சில செய்திகளைத் தெரிந்து கொள்வோம்.

சுற்றிணைப்பு மாற்றம் (Circuit Switched) : இது சாதாரணமாய் நம் தொலைபேசி இணைப்பகங்கள் பயன்படுத்தும் இணைப்பு முறை . செல்பேசியில் நாம் பேசும் போதும் (Voice) இவ்வகை இணைப்பே பயன்படுத்தப்படுகிறது . இவ்வகை இணைப்பினை ஏற்படுத்தினால், இணைப்பைத் துண்டிக்கும் வரை உங்களுக்கு ஒரு தடம் (Channel) ஒதுக்கப்படும். நீங்கள் தொடர்பு ஏற்படுத்தியபின் பேசிக்கொண்டிருந்தாலும் அல்லது பேசாமல் மௌனம் சாதித்தாலும் தடம் உங்களுடையது தான். எவ்வளவு நேரம் இணைப்பு இருக்கிறதோ அவ்வளவு நேரத்திற்கும் கட்டணம் வசூலிக்கப்படும் . செல்பேசியில் பேசுவதற்கு நீங்கள் தள நிலையத்துடன் தொடர்பு ஏற்படுத்துகையில் ஒரு நேரத்துண்டு ( Timeslot) உங்களுக்கு வழங்கப்படுகிறது . இந்த நேரத்துண்டுதான் தடம். நீங்கள் பேசி முடிக்கும் வரை இந்த நேரத்துண்டு உங்களுடையது தான் . இதுபோல் இவ்விணைப்பினைப் பயன்படுத்தி இணையத் தொடர்பு ஏற்படுத்துகிறீர்கள் எனலாம். பேசுகையில் எவ்வாறு ஒரு நேரத்துண்டு வழங்கப்பட்டதோ அதேபோல் தன் தற்போது தரவுப் பரிமாற்றத்துக்கும் ஒரு தடம் வழங்கப்படும் . செல்பேசியில் ஒரு குறிப்பிட்ட இணையப்பக்கத்தைப் படித்துக் கொண்டிருக்கிறீர்கள். அப்போது தரவுப் பரிமாற்றம் எதுவும் நிகழ வில்லை எனலாம் . என்றாலும் உங்களுக்கு ஒதுக்கப்பட்ட தடம் உங்களுடையதுதான். இணைப்பை நீங்கள் துண்டிக்கும் வரை அத்தடம் உங்களுடையதே.


பேச்சுப் பரிமாற்றத்துக்கு இவ்வகை சுற்றிணைப்பு மாற்றம் பயன்மிக்கதே. ஆனால் தரவுப் (Data) பரிமாற்றம் செய்கையில் தொடர்ச்சியாக ஒரு தடம் நமக்கு இணைக்கப்பட்டிருத்தல் அவசியமற்றது. உதாரணமாய், உங்களுக்கு வந்த மின்னஞ்சலை செல்பேசியில் படித்துக் கொண்டிருக்கிறீர்கள் எனலாம். அந்த நேரத்தில் தரவு எதுவும் தள நிலையத்திலிருந்து அனுப்பப் படவில்லை . ஆனால் உங்களுக்குக்காக ஒதுக்கப்பட்ட தடம் பயனின்றி உங்களுக்காகவே இணைப்பிலிருக்கிறது . மீண்டும் வேறு தகவல்களை நீங்கள் செல்பேசியில் தரவிறக்கம் செய்து பார்க்கும்வரை அந்தத் தடம் பயன்படுத்தப்படுவதில்லை, வீணடிக்கப்படுகிறது.

ஆக, எப்போதெல்லாம் உங்களுக்குத் தரவு அனுப்ப/பெற வேண்டுமோ அப்போது மட்டும் உங்களுக்கு ஒரு தடம் ஒதுக்கப்பட்டால் போதுமானது அல்லவா ? தொடர்ச்சியாய் ஒரு தடம் இணைப்பிலிருப்பது , தடத்தினை வீணடிக்கும் செயல்தான் . ஒரு தள நிலையத்தில் ஒரு குறித்த நேரத்தில் எட்டு நேரத்துண்டுகள் (எட்டுத்தடங்கள்) எட்டுச் செல்பேசிகளுக்கு வழங்கப்படலாம் என்று முன்னர் படித்தோமல்லவா ? பேச்சுப் பரிமாற்றத்துக்கெனில் , எட்டுச் செல்பேசிகளுக்கு எட்டு நேரத்துண்டுகள் தொடர்ச்சியாய் வழங்கப்படலாம் . உங்கள் செல்பேசி தரவுப் பரிமாற்றத்தில் ஈடுபட்டுக்கொண்டிருந்தால், தரவுப்பரிமாற்றம் நிகழ்கையில் மட்டும் அந்த நேரத்துண்டை அந்தச் செல்பேசிக்கு வழங்கலாம். தரவுப் பரிமாற்றம் முடிந்ததும் , அந்நேரத்துண்டு விடுவிக்கப்பட்டு பிற செல்பேசிகளுக்கு வழங்கப்படலாம். மீண்டும் சிறிது நேரத்தில் நீங்கள் வேறொரு இணையப்பக்கத்தைப் பார்க்க விழைந்து ஒரு பட்டியைச் சுட்டினால் , எந்த ஒரு செல்பேசிக்கும் வழங்காமல் எஞ்சியிருக்கும் ஏதாவது ஒரு நேரத்துண்டில் உங்களுக்குத் தகவல் அனுப்பப் படலாம்.

இவ்வாறு தொடர்ச்சியாய் ஒரு குறித்த தடம் ஒதுக்காமல், எப்போதெல்லாம் தரவுப் பரிமாற்றம் இருக்கிறதோ அப்போது மட்டும் ஒரு தடம் ஒதுக்கித் தகவல் பரிமாற்றம் செய்வதைப் பொட்டல இணைப்பு (Packet Switched) என்று அழைக்கலாம். கணிணிகளிடையே ஏற்படுத்தப்பட்டிருக்கும் இணைப்பில் இவ்வழியிலேயே தகவல் பரிமாற்றம் நிகழ்கின்றது . அலுவகத்தில் ஏறப்டுத்தப்பட்டிருக்கும் வலையமைப்போ, அல்லது இணைய வலையமைப்போ , எல்லாவகை கணினி வலையமைப்புகளிலும் இவ்வகைப் பொட்டல இணைப்புத்தான். செல்பேசியிலும் இவ்வகை இணைப்புகளை ஏற்படுத்த இந்தச்சேவை துணை புரிகின்றது.

செல்பேசி இணைய வேகத்தினை எவ்வாறு அதிகரிப்பது என்பதை இப்போது பார்ப்போம். ஒரு தள நிலையத்தில் இணைக்கப்பட்டிருக்கும் செல்பேசிகள், பேச்சோ, தரவோ பரிமாறிக்கொள்ள வேண்டுமெனில் ஒரு நேரத்துண்டினைக் கேட்டுப்பெற வேண்டும் என்று ஏற்கனவே பார்த்தோம். ஒரு வினாடியில் 9.8KBits அளவே தரவு அனுப்ப முடியும். ஆனால் இது ஆமை வேகம். என்ன செய்யலாம்?

சாதாரணமாய், பேச்சோ, தரவோ செல்பேசியிலிருந்து அனுப்ப/ பெறப் படும்போது பேச்சு/தரவு அப்படியே அனுப்பப்படுவதில்லை. பாதுகாப்புக்காரணம் கருதி (அதாவது எவரும் இடைமறித்துக் கேட்டாலும் அவர்கட்கு விளங்காத வண்ணம்) குறியீடு (Coded) செய்தே அனுப்பப் படுகின்றன. இந்தக்குறியீட்டுத்தகவல்களைக் கொஞ்சம் குறைத்தால் , சற்று அதிகப்படியான தகவல்கள் அனுப்ப முடியும் அல்லவா? எப்படி குறியீட்டுத்தகவல்களைக் குறைப்பது?. உதாரணமாய் நான்கு தரவுத்தகவல்கள் இருப்பதாய்க் கொள்வோம். ஒவ்வொரு தகவலையும் நான்கு குறியீட்டு தகவல்களால் குறித்தால் , 4X4 = 16 தகவல்கள் அனுப்பப் பட வேண்டும். 16 தகவல்கள் அனுப்பினாலும் , எதிர்முனையில் அது பெறப்படும் போது மீண்டும் குறியீட்டை நீக்கி நான்கு தகவல்களே பெறப்படும். சரி , நான்கு குறியீட்டுத் தகவல்களுக்குப்பதில் இரன்டு குறியீட்டுத் தகவல்கள் பயன்படுத்தினால்? 8X2 =16; எட்டுத்தகவல்களை அனுப்ப முடியும் ! குறியீடே செய்யாமல் அனுப்பினால்? 16 தகவல்கள் அனுப்ப முடியும்.

சரி, நாம் ஜி எஸ் எம் சேவைக்கு (GSM) வருவோம். தரவு அனுப்பப் படும்போது குறியீட்டுத்தகவலோடு ஏற்றி அனுப்பினால் ஒரு வினாடிக்கு 9.05 கிலோபிட்ஸ் தான் தரவு அனுப்ப முடியும். குறியீட்டுத்தகவல்களைச் சற்றே குறைத்து அனுப்பினால் 13.4 Kbits வரை அனுப்பலாம். குறியீட்டுத்தகவலை இன்னும் கொஞ்சம் குறைத்தால்? 15.6 Kbits வரை தரவுப் பரிமாற்றம் செய்யலாம். குறியீட்டுத்தகவலே வேண்டாம் என்கிறீர்களா? அப்படியானால் 21.4 KBits வரை அனுப்பலாம்.

ஆக, ஒரு நேரத்துண்டைப் பயன்படுத்தி, தரவுத்தகவலை குறியீட்டுத்தகவலோடு ஏற்றாமல் அனுப்பினால் அதிகபட்சம் 21.4 Kbits வரை ஒரு வினாடிக்கு தகவல் அனுப்பலாம். 21.4 Kbits என்பதும் குறைவான வேகமாய்த்தான் தெரிகிறது. இன்னும் வேகத்தை அதிகரிக்கலாம் என்கிறீர்களா? அதற்கு என்ன செய்வது?

தகவல் பரிமாற இப்போது ஒரு நேரத்துண்டைத் தானே பயன்படுத்துகிறோம்! ஒன்றுக்கு மேற்பட்ட நேரத்துண்டை ஒரே நேரத்தில் ஒரு செல்பேசிக்கு வழங்கினால் என்ன? நல்லதொரு திட்டம். ஒரு குறித்த நேரத்தில் ஒன்றுக்கு மேற்பட்ட நேரத்துண்டுகளை ஒரு செல்பேசிக்கு வழங்கி, இணைய இணைப்பின் வேகத்தை அதிகரிக்கலாம் ?? எப்படி என்பதை அடுத்த பதிவில் எதிர்பாருங்கள்.

துறை சார்ந்த இவ்வாறான் பதிவுகளுக்கு நீங்கள் தரும் ஆதரவைப் பொறுத்து.... இன்னும் சில துறை சார்ந்த பதிவுகளை இட எண்ணியுள்ளேன்...